"Quş sürüsü toqquşma zamanı təyyarənin quyruğunu zədələyə bilər".

Teleqraf.com xəbər verir ki, bunu aviasiya eksperti Vadim Lukaşeviç deyib.

"Quş sürüsü təyyarənin hava girişinə daxil olmaqla yanaşı, onun quyruğunu zədələyə bilər. Bu da təyyarənin gövdəsi, qanadları və stabilizatoruna təsir göstərir. Aktaudakı qəzada təyyarənin yerə düşmədən öncə idarəetməsində çox böyük problemləri olub. Qəzadan öncə təyyarə gah hündürə qalxır, gah da suya yaxın uçmağa başlayır. Sonradan pilotlar güclə təyyarəyə hündürlük qazandırmağı bacarıb. Bu, pilotların sona qədər döyüşdüyünü deməyə əsas verir. Daha çox hündürlük və vaxt olsaydı, bəlkə də hər şey fərqli olardı" - ekspert qəza barədə bildirib.

Ekspert əlavə edib ki, təyyarə eniş anında artıq yerə paralel idi:

"Ancaq sürət yüksək olduğundan təyyarə yerə dəydi və quyruq hissəsi qopdu. Bu da təyyarənin arxa hissəsində oturanları xilas etdi. Ümumiyyətlə, quyruq təyyarədə ən təhlükəsiz yerdir. Fəlakətlər zamanı quyruq hissəsi daha az əzilir və ya sadəcə qopur.

V. Lukaşeviç pilotların təyyarəni niyə dənizə aparmadığını da deyib:

"Təyyarəni dənizə düşürmək ağılsızlıq olardı, çünki su daha təhlükəlidir. Bu vəziyyətdə tarlaya eniş ən təhlükəsiz variant idi. Təyyarədəki sərnişinlərin bəxti gətirmədi ki, Bakıdan Qroznıya uçmaq üçün Xəzər dənizinin qərb sahili boyunca düz xətt üzrə getmək lazımdır. Bu zaman təyyarə dumanlı və ya tamamilə buludlu havaya düşüb. Buna görə də pilotlar Xəzər dənizinin o tayına getmək barədə qərar qəbul edib" - Lukaşeviç izah edib.

Təyyarədəki oksigen balonunun partlaması ilə bağlı iddialara gəlincə, Lukaşeviç bu iddianın səhv olduğunu bildirib:

"Qəza zamanı maskalar özü avtomatik açılır və sərnişinləri 5-10 dəqiqə davam edəcək oksigenlə təmin edir" - mütəxəssis açıqlayıb.

Ekspert sonda məhkəmə ekspertlərinin tapılan bütün qalıqları və uçuş qeydlərini təhlil etməli olacaqlarını deyib. Bundan sonra faciənin əsl səbəblərini öyrənmək mümkün olacağını bildirib.