Qərb ölkələri Ermənistandakı etirazları “görmürlər”, çünki Gürcüstandan fərqli olaraq, bu etirazlar onların maraqlarını əks etdirmir.

Publika.az xəbər verir ki, bu barədə “Sputnik Ermənistan”a siyasi strateq Armen Badalyan deyib.

Onun sözlərinə görə, Ermənistanda polis nümayişçilərə qarşı Gürcüstandan qat-qat sərt davranır.

“Lakin bu, başqa sualdır, Qərb mediası Gürcüstanda polisin güc tətbiq etməsinə diqqət yetirir və narazılığını bildirir, lakin Ermənistanda bir sıra səbəblərə görə belə deyil”, - deyə Badalyan bildirib.

“Üstəlik, Gürcüstanın timsalında məsələ heç də hüquq-mühafizə orqanlarının əməkdaşlarının güc tətbiq etməsinin proporsionallığından getmir. ABŞ-da polis, məsələn, Fələstin tərəfdarı tələbələrə qarşı daha sərt davranır.

Məsələ burasındadır ki, Gürcüstan xarici agentlərlə bağlı Qərbin maraqlarına söykənməyən qanun layihəsi qəbul edir. Və polis bu sənədə qarşı çıxan nümayişçilərə qarşı güc tətbiq edir”, - politoloq bildirib.

Siyasi strateqin fikrincə, Litva və Almaniyadan deputatların Gürcüstana gəlməsi və mitinqlərdə iştirak etməsi heç də təsadüfi deyil.

“Ermənistanda isə hakimiyyət Cənubi Qafqazda Qərb siyasətini təbliğ edir, müxalifət Aİ və ABŞ bayraqları ilə mitinqlərə qatılmır”, - deyə Badalyan bildirib.

Beləliklə, Qərb dövlətləri, siyasi strateqin fikrincə, sadə prinsip əsasında hərəkət edirlər - onlar yalnız öz maraqlarına toxunan hallarda reaksiya verirlər.

Eyni zamanda, Badalyan qeyd edib ki, həm Ermənistanda, həm də Gürcüstanda polis islahatları Qərb dövlətlərinin köməyi ilə həyata keçirilsə də, birinci halda bu, sırf formal xarakter daşıyır. Pul və qrantlar daxil oldu, amma real islahatlar olmadı.

“Gürcüstanda hələ də demokratik sistem var, Ermənistanda isə hüquq-mühafizə sisteminin tabe olduğu bir şəxsin hakimiyyəti var”, - deyə siyasi strateq qeyd edib.

Tural