İsrailin Həmas ilə müharibəsinə ilk reaksiya, bazar günü axşam neft qiymətlərinin yüksəlməsi və ABŞ fond fyuçerslərinin düşməsi ilə gəldi.

Publika.az CNN-ə istinadən xəbər verir ki, İsrail əsas neft istehsalçısı olmasa da, neftlə zəngin Yaxın Şərqdə gərginliyin artması investorları qorxudub.

Bazar günü axşam ABŞ-da neftin qiyməti 4% artaraq barrel üçün 86 dolları ötüb. Qlobal etalon olan Brent markalı neft də təxminən 4% artaraq barreli 88 dollar civarında alınıb.

“SPI Asset Management”in idarəedici partnyoru Stiven İnnes bildirib ki, artım, çox güman ki, treyderlər arasında Yaxın Şərqdəki geosiyasi eskalasiyaya “əvvəlcə al, sonra sual ver” tərzdə reaksiya vermək meylindən qaynaqlanır: “Tarixi təhlillər göstərir ki, neft qiymətləri Yaxın Şərq böhranından sonra davamlı olaraq yüksəliş tendensiyası nümayiş etdirib”.

Birjalarda gözlənilməz dərəcədə güclü ABŞ əmək bazarı hesabatı fonunda cümə günü bahalaşan ABŞ fond fyuçersləri bazar günü axşam saatlarında kəskin ucuzlaşıb.

Dow fyuçersləri 200 bənd və ya 0,6% ucuzlaşıb. S&P 500 fyuçersləri 0,7% ucuzlaşıb. Nasdaq fyuçersləri isə 0,7% ucuzlaşıb.

Qlobal investorlar Yaxın Şərqdə uzunmüddətli gərginliyin kövrək qlobal iqtisadiyyatın bərpasına zərər verə biləcəyindən ehtiyat edirlər.