Kazarmada həlak olan əsgərlərin yaxınları Paşinyan və Papikyanla görüş tələb edirlər.

Publika.az “Sputnik Armenia”ya istinadən xəbər verir ki, Ermənistanın Qeqarkunik rayonunun Azat kəndində baş verən yanğında həlak olan əsgərlərin valideynləri Ermənistanın baş naziri Nikol Paşinyan və müdafiə naziri Suren Papikyanla görüş təşkil etmək üçün Nazirlər Kabinetinin nümayəndələrinə bir həftə vaxt veriblər.

Sağ qalan hərbçilərin ifadələrindəki uyğunsuzluqların yerli əsgərləri təşvişə saldığı və inamsızlığa səbəb olduğu bildirilir. Bundan əlavə, əsgərlərin ölümündən dərhal sonra aparılan DNT analizi ilə bağlı şübhələri var.

"Onlar bu qədər qısa müddətdə hansı hərbçinin kimin övladı olduğunu necə müəyyən edə bildilər? Lazım gələrsə, Avropada yenidən DNT analizi aparmaq üçün eksqumasiyaya getməyə hazırıq", - deyə əsgərlərdən birinin babası bildirib.

Eyni zamanda, vəkil Norayr Norikyan jurnalistlərə müsahibəsində qeyd edib ki, valideynlərin istintaqa və baş verənlərlə bağlı rəsmi versiyaya hədsiz etimadsızlığı var.

Xatırladaq ki, yanvarın 19-na keçən gecə saat 01:30 radələrində Qeqarkunik rayonunun Azat kəndində mühəndis şirkətinin müvəqqəti barakı kimi fəaliyyət göstərən evdə yanğın baş verib. Nəticədə 15 hərbçi həlak olub, daha üç nəfər yanıq xəsarətləri ilə Yanıq Mərkəzinə yerləşdirilib. Məlumata görə, yanğına səbəb isinmək üçün benzindən istifadə edilməsi olub.

Faciədən sonra 5 yüksək rütbəli hərbçi - 2-ci Ordu Korpusunun demək olar ki, bütün komandanlığı tutduqları vəzifələrdən azad edilib. Yanğınla bağlı 2 cinayət işi başlanıb.