Türkiyədə zəlzələ nəticəsində ailəsi vəfat etmiş və ya hələ tapılmamış uşaqların müvəqqəti qoruyucu ailələrə verilməsi məqsədilə elan edilən sistemə 190 min müraciət daxil olub.

Publiak.az “Hürriyet”-ə istinadla xəbər verir ki, Türkiyənin Ailə və Sosial Xidmətlər Nazirliyi zəlzələ bölgələrində ailəsi və qohumları ilə əlaqə saxlamaq mümkün olmayan uşaqların artıq qeydiyyata alınaraq tabe müəssisələrə yerləşdirildiyini açıqlayıb.

Məlumata görə, dağıntılar altından çıxarılan və qayğıya ehtiyacı olan uşaqlar üçün qoruyucu ailə olmaq istəyən minlərlə insan Elektron Hökumət portalı vasitəsilə Ailə və Sosial Xidmətlər Nazirliyinə müraciət edib. Qoruyucu ailə olmaq üçün müraciət edənlərin sayı 190 minə çatıb.

Nazirlik rəsmiləri bildiriblər ki, zəlzələdən əvvəl onlara gündə 2-3, ayda isə 10-12 müraciət daxil olub. Bildirilib ki, müdafiəyə və qayğıya ehtiyacı olan uşaqların nazirliyin nəzarəti altında xəstəxanalarda müalicəsi davam etdirilir və ilk növbədə uşaqların ailələrinə verilməsi istiqamətində iş aparılır.

Ailə və sosial xidmətlər naziri Derya Yanık 526 uşağın qeydiyyatda olduğunu, onlardan 78-nin ailələrinə təhvil verildiyini, 335 uşağın xəstəxanalarda müşahidə altında olduğunu, 113 uşağın hazırda nəzarətlərində olduğunu açıqlayıb.

Zəlzələdən xilas olan uşaqların dərhal qoruyucu ailə üçün müraciət edənlərə verilməyəcəyini ifadə edən Yanık, əvvəlcə nazirlik proseslərindən keçən və təsdiqlənən ailələrin müraciətlərini qiymətləndirəcəklərini söyləyib. Bu müddət ərzində müraciət edənlər isə zamanla izləniləcək və qiymətləndiriləcək.

Hüquqşünas Büşra Erman bildirib ki, sağlamlıq müəssisəsində müalicəsi başa çatan uşaqlar nazirliyin himayəsindədir və dərhal qoruyucu ailəyə verilməyəcək. Onun sözlərinə görə, ilk növbədə uşağın birinci dərəcəli yaxınlarının tapılması gözlənilir, daha sonra xalaları, bibiləri, dayıları və s. yaxın qohumları tapılır. Lakin həmin qohumlar uşağın himayədar ailəsi olmaq istəyərlərsə, bununla bağlı proseslərdən keçirlər, müraciət müsbət olarsa, qoruyucu ailə adını qazana bilərlər.

Qeyd edək ki, təbii fəlakət zamanı uşaqların müdafiəsi üçün qanuni prosedur var. Nazirlikdən verilən məlumata görə, zəlzələ bölgəsində kimsəsiz uşaqlar üçün “ALO 183” xətti ilə hüquq-mühafizə orqanlarına və ya Rayon Ailə və Sosial Xidmətlər Müdirliyinə müraciət etmək lazımdır.

14.12.2012-ci il tarixdə qəbul edilmiş Türkiyənin Qoruyucu Ailə Əsasnaməsinin 8-ci maddəsinə əsasən himayədar ailə şərtləri belədir: Türkiyə vətəndaşı olmalıdır (25-65 yaş). Ailə üzvləri ən azı ibtidai məktəb məzunu olmalıdır. Daimi gəliri olan şəxslər və ya cütlüklər müraciət edə bilər. Tək şəxslərin himayədar ailə ola bilməyəcəyinə dair ümumi fikir olsa da, bir ailənin artıq bioloji övladının olması onun himayədar ailə olmasına mane olmur. Qoruyucu ailə olmaq istəyən şəxslərin uşağın psixo-sosial inkişafına və təhsilinə təsir edə biləcək və ya uşağa zərər verə biləcək fiziki qüsuru, ruhi xəstəliyi və ya yoluxucu xəstəliyi olmadığını göstərməlidirlər. Bunun üçün dövlət və ya universitet xəstəxanalarının müvafiq şöbələrindən həkim rəyi alınmalıdır.