“COVID-19-un kəskinləşməsinin səbəbi yanaşı xəstəliklərin olmasıdır. Obez xəstələri də buraya daxildir”.

Oxu.Az xəbər verir ki, bunu ATU-nun Tədris-Terapevtik Klinikasının reanimasiya şöbəsinin müdiri Emil Qasımov operativ qərargahın KİV nümayəndələri üçün keçirilən brifinqində deyib.

O bildirib ki, bu barədə dəfələrlə məlumat verilib:

“Yanaşı xəstəliklərin olması virusun ağırlaşmasına və ölümə gətirib çıxarır. Orqanizm virusa reaksiya verir. Bunun nəticəsində immun sistemi mübarizə aparır və insan sağalır. Bu virus yeni olduğu üçün orqanizmin immun sistemi idarədən çıxır və orqanizmi zədələməyə başlayır.

Belə olan halda əsas ziyan ağciyərlərə dəyir. Ağciyərlər iltihab maye ilə dolur və oksigenin alışı pozulur. Hüceyrələr oksigenlə qidalana bilmədiyi üçün digər orqanlar da zədələnməyə başlayır, böyrəklər, ürək və digər orqanlar ziyan görür”.

Onun sözlərinə görə, dünyada və ölkəmizdə koronavirus xəstələrinin çoxu ağciyər çatışmazlığından ölür:

“Ölüm faizi Azərbaycanda 5-6 faiz olaraq qeyd edilib. Bu, dünya ölkələri ilə müqayisədə, stabil hesab oluna bilər”.